似成咁，一個做老一個做後生，演同一個角色啦～

1) Jack Nicholson > Leonardo DiCaprio
講左好耐，家下里安納度愈來愈似積尼高遜。神態似、戲路似，里安納度係爭在唔夠積尼高遜的「狂」（例如積尼高遜版的小丑）。我成日FF，《閃靈》remake里安納度做就正呀喂～「Hey Leo，介紹返，All work and no play makes Jack a dull boy，攞影帝有機架！」

2) Harrison Ford > Chris Pratt
其實都傳咗一段時間，Chris Pratt會接手做Indiana Jones。2008個集Indiana Jones原意係想交棒比沙拉保夫嘅，佢條死仔邊得丫，做來做去都只係死小孩。（Fury算有啲進步，係hehe角度上睇～）印象中見過Chris Pratt話演Guardians of the Galaxy的Star Lord時，已經係參考福伯的Indiana Jones / Han Solo；再睇返Chris Pratt黎緊套Jurassic World的劇照，真係好有Indiana Jones的氣質。

3) Bruce Willis > Josh Duhamel
我認，呢個純粹私心。12年布斯韋利士套Looper，係Joseph Gordon-Levitt做佢後生，真係辛苦佢了。好多fans話，要JGL夾硬化到個樣似布斯韋利士鬼咁心痛，我就無心痛嘅，不過真心唔係好似。布斯韋利士呢種粗中有細的硬漢型，我反而想起Josh Duhamel。中意Josh Duhamel係佢套美劇Las Vegas開始，飾演一個外剛內柔的賭場保安阿頭，更多人認識佢應該係Transformers入面個美軍軍官。佢大可以行布斯韋利士條硬漢路線，拿拿臨拍科幻動作大片，再唔係埋堆做superhero，咪鬼再拍愛情小品喇！上唔到一線架！（又，Bruce Willis同Josh Duhamel真係合作過，12年的Fire With Fire，不過香港直頭無上，唉。）

4) Jeff Bridges > Ewan McGregor
如果你有睇Remake個套Tron，就知我想講咩……Jeff Bridges個角色（老年版）根本就係一個Jedi！仲要係Obi-Wan黎－－樣就真係唔太似嘅，感覺下啦大家～

5) Michael Caine > Jude Law
核彈－－我孤陋寡聞，我淨係識管家阿福，我無睇過Michael Caine後生的戲，唔知佢係咁風流倜儻、咁靚仔有型！同（未Ｍ額）的Jude Law一模一樣！！左定右，邊個係Michael Caine邊個係Jude Law？傻傻分不清呀～

6) Robert DeNiro、Al Pacino > ???
上一輩男影星，點可以無Robert DeNiro同Al Pacino？但我一野就諗到黃秋生同萬梓良……如果要拍港版Taxi Driver，只有黃秋生可以；諗起萬梓良，係因為佢都做過Al Pacino喺The Devil’s Advocate個撒旦（舞台劇版）。其實Robert Downey Jr都有啲似後生的Robert DeNiro嘅，咁係唔係要拉埋Eric Kwok落水？哈哈哈哈哈……

（所有圖片來自互聯網）

Bruce Willis，60歲生日快樂！

＊第五集，A Good Day to Die Hard劇照。圖片來自互聯網

天下間只有這個大叔可以光頭得咁sexy。
2009年的Surrogates，戲裏有另一個「完美」的Bruce Willis「替身」。所謂完美，係外貌上的完美，咁理所當然是有頭髮啦。呢個頂住一頭金髮，三七分界，pat蔭fing fing下的Bruce Willis……實在是好女人形。女人形到不堪入目，不堪入目到我連套戲都無睇。咁多年以來，除左早年成名時，大部分時間佢都keep住好短的毛毛skin head頭。突然之間要佢有好多頭髮好長頭髮，簡直係將Bruce Willis（係我心中）的形象破壞晒。

「地表最強老爸」的稱號，本來是Bruce Willis的，係近年先拱手相讓畀Liam伯伯。
Bruce Willis的成名作Die Hard，第一、二集救老婆，第四集救女，第五集救仔（掉底Jack一個佢死硬），唔好忘記，仲有成套戲都係唔想個女中意賓艾佛力條死仔的《絕世天劫》！！呢套Bruce Willis唔用打生打死的方法去救個女，而係去炸咗舊殞石！你估Bruce Willis真係好想救地球，其實佢只係想救阿女咋！到最後仲要出埋啲老套劇情（唔係點叫出自米高悲）：為左阿女，賓艾佛力你條死仔唔可以死呀，你應承我一定要娶佢一定要對佢好，仲有話佢知我愛佢！（以上唔係真實對白，係我根據劇情的自己腦補。）跟住推走賓艾佛力，一個人完成任務犧牲自己～～強大到上太空唔要自己條命都要救女……鳴呀！翻睇最後佢同阿女視像通話個段我又喊到死！Coz I’d miss you baby, And I don’t wanna miss a thing~~

每次望住Bruce Willis，尤其係佢做John McClane時，就覺得個心畀啲小鹿狂撞。
第一次睇Die Hard，十歲都唔夠，腦筍都未生埋。戲入面Bruce Willis飾演的John McClane，喺我個條未生埋的腦筍入面，好好打、好爆、好man、好型、好勁！（十歲都唔夠係詞彙貧乏啲架喇）。一直到1999年的《鬼眼》，套戲唔單只係Bruce Willis開到新戲路兼切也馬蘭一炮而紅（不過兩個都係只此一次），更重要係因此勾返起我果條已經生埋左既腦筍深處的記憶－－Die Hard入面果個打不死的「牛仔」John McClane，咪就係呢個咁好戲的大叔！
即刻翻睇Die Hard，大咗詞彙豐富返啲，先講得出John McClane的膽大心細，用情專一。第一集佢係天台用消防喉綁住自己就跳落樓、第二集炸左架飛機同上面的壞人，綁自己係個駕駛位度彈自己出去，佢既魯莽其實係佢既勇氣。支撐住佢每次做大鑊的，唔單只因為佢係紐約警察，更大的力量係因為要救老婆仔女，即使佢老婆基本上已經離意已決，佢仍然好似傻佬咁去老婆公司留下等佢，去機場接佢。裡裡外外，John McClane好似一個role model咁，如果我係男人，我會想學佢；因為我係女，自然睇到雙眼發光，心如鹿撞。

Superhero成行成市前，John McClane已經係Hero。
John McClane唔需要好似美國隊長咁係強化人，或者Iron Man咁有超強裝甲，佢每次都係被壞人整到爛身爛世，第一集仲要慘到無鞋著踩到一腳都係玻璃（諗起就覺得痛）。去到第四集無啦啦變左superhero，一個地球人都可以拉跌架轟炸機，癡線，就算係「地表最強老爸」都無理由做到啦，呢一集最唔好睇。第五集黎講，今次用架貨車幫拖先扯得跌人地架直升機，好似合理返啲。John McClane係Hero，唔係Superhero，第六集希望佢地記住呢點（係呀Bruce Willis 親口講話自己仲跑得仲打得，會拍第六集）。而家有Avengers，唔使John McClane去做superhero架喇。

我唔係無啦啦寫Bruce Willis的。尋日3月19號，係我男神的60大壽。60歲都仲要拍Die Hard 6，你真係好堅。
Happy Birthday Bruce Willis!!
你永遠係我唯一一個男神。

My Movies of the Year 2013：(1)票房十大短評

好了，每年回顧的重頭戲來了！電影回顧！

2013年看的戲沒2012年的多，回落到2011年的數量，只計入戲院的，看了67套戲~~仍然以外語片為主（39套），港產／華語片10套，動畫22套（包括短片節目，都話我係動畫電影迷，一年大大小小電影節的動畫節目，我係會睇晒的。係 ‧ 睇 ‧ 晒！）67次進戲院有24場是電影節。年年我都說要多看港產片支持本地製作，但幾年下來每年都是看10套左右，我想這個數是臨界點了。

短評一下十大票房電影：

2013 年最高票房十大非香港電影
（資料來源：電影市場學page）

1. 《鐵甲奇俠3》$106,389,801：
   東尼大叔自負囂張的個性原是Iron Man系列中最吸引人最好看的地方，花花公子玩世不恭的他，本性就是個無賴。這種帶有缺憾的superhero和主角往往特別吸引，因自身不足而引發的故事亦更顯人性，故事就特別好看。上兩集無賴怎樣學會了大義，怎樣追尋愛情，就是東尼大叔的成長。經歷兩集加《復仇者聯盟》的眾多事件，今集東尼大叔變得沒那麼外露，因為患了情緒病。（他病發呼吸困難，自覺太真實，感同身受。我當然沒那麼嚴重。）少了無恥囂張的演出，注定沒前作的亮眼。又沒有我女神Scarlett Johansson和型棍的Mickey Rourke，總覺得失色些許。不過演滿大人的Ben Kingsley也不是省油的燈，前後對比為電影加了不少分數。（先不論電影有沒有忠於漫畫原著這個問題。）最後大戰的機體大show case，是名副其實的Party Mode，讓我這個迷戀機械人的小粉絲看得很爽。唯一要挑剔就是每部機只是打得幾野，然後就為左氹阿小辣椒開心而炸Q晒佢地，有點可惜喇。（東尼大叔是天才嘛，要整過容乜易！）另外最後一幕東尼大叔將那個原本裝在他心臟的核心隨手掉落海，我覺得太求其。以他的小心眼性格，不會這麼隨意就掉了這個高科技產物。被壞人執左點算？我送比今集個細路唔好？至於3D IMAX效果？講呢啲？算吧啦。
   －
2. 《怪獸大學》$77,407,664：
   無睇。雖然我是動畫電影迷，但我對CG動畫無乜好感，不論是pixar還是迪士尼還是夢工場都一樣，基本上CG動畫我係唔會睇的。
   －
3. 《地球末日戰》$42,602,911：
   這套要留返下集詳細講！
   －
4. 《雷神奇俠2：黑暗世界》$36,675,250：
   今集比上集好睇太多太多了。上集只是前導片，交代完人物就沒有了。今集才是完完整整的故事，而且是有扭橋的故事！電影前半正正常常一貫superhero片開展，到洛基一出場，馬上提升一級，全套戲由洛基一個人擔起！你以為他不服，原來只是傲嬌！哥哥放他出監就馬上生龍活虎狂變身！（這段美國隊長來客串全院大笑！我同另一邊的某觀眾仲笑到拍手！）去到打壞人，以為條死仔真係咁衰出賣阿哥（喂洛基份人真係咁仆街架喎！），點知原來是計！（嗚呀！洛基你欺騙我～）Tom Hiddleston演得太好，他的鋒芒蓋過了全片所有演員。我喜歡《雷神2》多過《Iron Man3》！
   －
5. 《超人：鋼鐵英雄》$33,328,214：
   無睇。朋友看完回報麻麻地。竟然有Superhero戲我無睇，太可惜。
   ＿
6. 《壞蛋獎門人2》$32,603,704：
   無睇。原因同《怪獸大學》一樣。
   －
7. 《悍戰太平洋》$31,724,872：
   ！！！！！！！！這套要留返下集詳細講！！嗚呀！！
   －
8. 《虎膽龍威：擇日開戰》$28,679,709：
   我最愛的布斯韋利士做返John McClane，我最期待的畫面出現了！盲目的愛你地唔明架喇！（我寫這短評時重溫劇照，個心又比啲小鹿狂撞喇～早前我寫過的《Die Hard》回顧。）拍到第５集，John McClane徹底地變成光頭大叔，戲亦變成好簡單好普通的動作槍戰片，沒有第一、二集耍小聰明的設計了。不過我覺得比第４集好一點，第４集John McClane好似啲superhero咁勁，單手拉住架轟炸機狂轉都唔死，有無搞錯？！今次揸架貨車拉跌架直昇機……都係誇張架喇，但以John McClane黎講，佢做到既……另外，我有極大的不滿，Trailer明明條女拉拉鏈拉到好低見到成個胸，點解正場時cut走左？！未拉到心口就cut了！Yippee-ki-yay motherfucker!
   －
9. 《哈比人：荒谷魔龍》$ 28,265,390：
   無睇。《魔戒》不是我杯茶。
   －
10. 《非常盜》$ 27,817,183：
    好開心，《非常盜》是我心水的黑馬。能夠躋身十大，絕對是口碑的力量。沒有大cast，較出名的只有Mark Ruffalo（《復仇者聯盟》的綠巨人Hulk）和Morgan Freeman，而這兩位都不是靠樣子吸引人入場的。電影賣的就是一場魔術大龍鳳，儘管故事有點bug，但確實像一場魔術show，另加破解魔術說明，緊湊地用畫面和魔術的魅力吸引著觀眾到完場。

2013 年最高票房十大香港電影
（資料來源：電影市場學page）

1. 《激戰》$44,631,344：
   實至名歸。下下集詳講。
   －
2. 《掃毒》$ 30,299,024：
   因為支持港產片，所以對港產片好寬容。全套戲，只有兩個可觀位：１）直昇機掃射的大場面。港片拍到這樣浩大的槍戰，陳木勝的確有一手，很爽、夠勁（第３聲）。２）張家輝vs劉青雲，邊個好戲。我覺得張家輝小勝，贏在聽到劉青雲揀了古天樂，知道自己要死那分鐘的一個表情。劉青雲就一貫演出，沒有特別神來之筆。假如張家輝、劉青雲的演技是master級，古天樂只是中學雞。尤其是最後三人排排坐表白話當年（呢幕已經夠老套），只是突顯了古天樂跟二人的差距。
   －
3. 《西遊。降魔篇》$ 28,401,227
   無睇。唔再睇周星馳！
   －
4. 《風暴》$ 21,737,836
   頭東睇完回來，劣評，但表示最後好cult。於是我一心用《妖獸都市2之地獄聖女》的惡搞心態入場等笑。可能劇透太多，我－完－全－笑－唔－出－呀！！！講返套戲，前半營造的警匪鬥智、劉華vs林家棟，可以，收貨（因為對港產片好寬容）。但呂良偉突然出場、入到中環，就失控了。本來中環鬧市警匪槍戰大爆炸是很好看的，但１）拖得太長，２）劉華太無敵而班賊太無知，在我看來是拖時間。（因為我連笑都笑唔出呀。）這是劇本問題，也是導演問題。編劇加導演的袁錦麟是新導，控制不了節奏、場面和劇本的配合，是導演功力未夠。這方面陳木勝小勝一個回合，《掃毒》贏個馬鼻。（《掃毒》編劇都是袁錦麟，唉。）
   －
5. 《一代宗師》$ 21,292,885
   其實我唔喜歡王家衛，所以無睇。後來屋企電影台睇了15分鐘，頂唔住，好悶，放棄。
   －
6. 《逃出生天》$ 20,333,828
   唔睇大陸片。（好彩！）
   －
7. 《百星酒店》$ 19,443,275：
   話過唔會再睇黃百鳴的戲，無入戲院睇。但之後係屋企唔覺意睇左。只係值係屋企睇。
   －
8. 《殭屍》$ 17,164,014
   因為《殭屍》而寫了一篇公屋長走廊的鬼故文：黃大仙上邨那長長走廊。電影留待下下集詳講。
   －
9. 《2013 我愛 HK 恭囍發財》$ 16,953,263
   純粹因為每年入場睇賀歲片的習慣而入場看了。幾乎零記憶，無事可記……丫，有一樣！個景好假！
   －
10. 《飛虎出征》$ 16,747,563
    無睇。

＊　＊　＊

最最後，請原諒我自high，我要貼出我今年入戲院睇的67套戲～～（FF：如果有人點名要我講以下電影，我都可以短評一下的～）

海嘯奇蹟、黑殺令、格林雙俠：獵巫世紀、終極封鎖線、雲圖、2013我愛HK 恭囍發財、虎膽龍威：擇日開戰、喪星玩轉荷里活、心之印記（蜜糖的膚色）、歡樂皺紋、合家歡動畫精選、大渡海（字裡人間）、世界動畫精選、孫遜動畫精選、賴恩拿堅短片集、癲狗喪七、花都友奇緣、義勇群英：毒蛇反擊戰、閃靈237、成人動畫精選、催眠潛凶、同謀、攻．元2077、福音戰士新劇場版：Q、鐵甲奇俠3、大亨小傳、ifva得獎作品免費放映：節目2、言葉之庭、星空奇遇記：黑域時空、醉爆伴郎團3、非常盜、地球末日戰、感人至深小故事、盲探、全球動起來（節目一）、全球動起來（節目二）、派報紙的男孩、啪嗒啪嗒，了不起的鯖魚、世界奇妙動畫、最「德」動畫、悍戰太平洋、小樂天與月光魔法石、狂舞派、獨行俠、激戰、勁揪俠2、魔都獵人：骸骨之城、愛在希臘午夜時、猛火爆2、性人君子、引力邊緣、特殊身份、打救豬玀、雷神奇俠2：黑暗世界、殭屍、人類滅亡報告書、逃亡大計、一代電影粉皮、末世列車、愛雅、國至與鳥、假面騎士×超級戰隊 超級英雄大戰、掃毒、風起了、風暴、浪魂47。

見到布斯韋利士心如鹿撞

人愈大愈覺得無人明白自己所以愈容易因為共鳴而眼濕濕。

巴：問心，《Die Hard》好睇到爆烈。現在的荷里活動作片，已經絕少、甚或不會再有《Die Hard》那份細緻。
月：Yes，細緻。真正緊湊的動作戲份其實去到電影差唔多播咗一粒鐘才正式出現，而之前的，就一直在鋪，鋪排點解身為NYPD的John McClane要飛去洛杉磯搵老婆？點解對付壞人時又冇著鞋？而那個偶然發現事故的寂寞黑人巡警點解唔敢開槍？是否有甚麼精神創傷？所有鋪排，都在建立一個極端危險局面，而同時指涉著各人內心深處。
〈原因不要理，浪漫地睇聖誕舊戲〉－－月巴氏

讀到月巴寫《Die Hard》，我最愛最愛既《Die Hard》，我竟然因為那一串問句而眼濕濕。呢部男人戲，篤定左我對動作片的熱愛（另一部同另一類係《異形》之於科幻片！）當年第一次睇都唔知有無10歲的我，John McClane呢個男人，勁過晒今日拍到成行成市既所有superheros！係 . 所 . 有！John McClane / 布斯韋利士係我心裡面第一個同永遠都係得佢一個hero呀！

第一集當然是開山作，不過我最喜歡的情節係第二集最後，John McClane點著奸角架飛機漏緊既機油，啲火一路燒一路追住上架飛機，炸死晒班壞人！Boom！！個條火舌仲用埋黎做照明比其他飛機降落！咁聰明同咁爽皮地一箭雙鵰ko最後大佬！

用「主角威能」去解釋，當然可以簡單快捷地說明點解John McClane打極都唔死，仲可以拍到第5集；不過這就沒意義了。John McClane呢條佬，膽大心細，被整得好慘好慘，渾身是血是傷，但佢仲可以利用現場環境，用癡那線的方法搏一鋪殺死壞人（同時整到自己再慘啲）。第一集係天台用消防喉綁住自己就跳落樓、第二集炸左架飛機同上面的壞人，綁自己係個駕駛位度彈自己出去，佢既「魯莽」其實都係佢既「勇氣」。（去到4集John McClane單手扯住架戰鬥機跟本就唔係人，所以我最唔中意第4集。）仲有佢個種口賤、粗枝大葉但用情深厚（對老婆同仔女），帶點落魄的麻甩除，令一個hero有返晒「人性」既不足，亦係咁更討人歡喜。

如果話，少女睇愛情片，睇到男女主角排除萬難終於幸福快樂地生活下去而雙眼發光腎上腺素狂飆（yeah～就係《性人君子》入面女神Scarlett Johansson個角色喇），我完全skip左呢樣野，腦筍都未生埋就直接去左動作片男人的浪漫。

即使廿幾年後的今日，布斯韋利士已經變成一個光頭大叔，我見到佢既大頭燈箱廣告都仲有心如鹿撞既感覺！（呢條友癡左線，半夜三更寫文J一個58歲的阿伯！）

講開又講，布斯韋利士今年套《Red2》，開場無耐個幕放啲薯片係地，然後藉敵方踩到薯片而發出的聲音去判定敵人位置，呢個設計確係令我諗起John McClane！諗起第一集《Die Hard》佢赤腳踩到一地都係玻璃碎既慘況！

Bruce Willis is my hero, EVER!!
Yippee-ki-yay motherfucker!

My Movie of the Year 2012 (下)

My Movie of the Year 2012
《普羅米修斯Prometheus》《時凶獵殺Looper》

要選一套年度之作，有點難。今年的看過的電影，確實沒有一套如去年《變種特攻：異能第一戰X-Men: First Class》或《鐵甲鋼拳Real Steel》那樣，客觀地好睇自己又鍾意。結果出於個人情意結，選了《普羅米修斯Prometheus》。不關乎個人情意結，選了《時凶獵殺Looper》。

在這裡談過很多次，「明珠930」絕對是我的電影啟蒙；啟蒙中的啟蒙就一定是《異型》。《異形》第一集，幾個船員走入那個不明的「遺蹟」，發現一具外星化石（space jockey）坐在類似駕駛艙的地方，這一幕是我的電影記憶裏，一個很重要的場面。今集前傳，很詳細的說明了那個space jockey是什麼東東，彷彿還了我一個心願。

＊《普羅米修斯》（上）和《異型》（下）裡的space jockey。

《異形》是我小時候，我媽堅持關掉全屋的燈，刻意營造恐怖氣氛，全家坐定定一起看的明珠930。到《普羅米修斯》上映，我期待十足，和我媽、弟弟三人齊齊進電影院，一家人齊齊看大家都十分喜歡電影。《異型》前四集，我都是看明珠930的，終於可以在戲院大銀幕上看，看一套啟蒙自己的電影的前傳，你說怎不興奮？問心，《普羅米修斯》遠遠及不上《異型》前作，可是我們仨都興奮極了，散場之後一起回想《異形》前四集的故事，討論《普羅米修斯》和異形的關係至夜深。然後，我還是意猶末盡，不斷上網看資料、看YouTube重溫 ……最終，那個晚上我失眠了，一合上眼，就看到各種形形色色的驚慄片段，無法入睡。（這大概是我近十年八年的唯一一次失眠。）

[豆瓣]《普羅米修斯Prometheus》劇照（這一幕確是美呆了）
[YouTube] 《普羅米修斯Prometheus》Trailer

說《時凶獵殺Looper》沒有情意結，有點不好意思，因為電影是我最喜歡的Bruce Willis主演的。而成為他的Die Hard Fans亦因為在明珠930看過他的《Die Hard》。回說《Looper》，科幻／動作片一向是我飛佛。近年續集／改編當道，許多都千人一面。《Looper》兩者皆非，自然加分在先，更是新進導演，是Rian Johnson第三次執導長片而已，故事也是自己寫的，身兼編導，自然更能看得出他的想法。

電影在美術、節奏、畫面處理，以至time travel的轉移和跳動，導演都放入了個人風格。我特別喜歡《Looper》的節奏，慢得來加強了懸疑感。它不賣荷里活最耍家的血脈賁張、大爆炸、子彈橫飛，它緊張、內斂而抑壓，形成不安和奇怪的慢。加上電影整體瀰漫的空曠、虛無、疲於奔命，即使最後歸結的無奈與宿命論不是什麼新鮮主題，但就場面和說故事方式都是導演嘗試破格的處理，也能拍出獨特的美感。尤其在科幻片這樣氾濫的2012年中，我覺得《Looper》非常獨特。

看完《Looper》，有點像第一次看Christopher Nolan的電影那樣，看到了這個導演的思考，看到了導演的野心。雖然，暫時而言，《Looper》當然及不上Nolan的高度，但我會繼續跟Rian Johnson的作品，希望他早日成名大爆發。

[豆瓣]《時凶獵殺Looper》相簿（裡面有大量劇照和工作照，可以看到導演的心力）
[YouTube] 《時凶獵殺Looper》Trailer
[YouTube]《時凶獵殺Looper》足本無字幕（竟然有ｄ咁既野！）

2012回顧系列
2011回顧：My Movie of the Year 2011