曾經有好一段時間,謝霆鋒就等如MK。無人會認自己中意過謝霆鋒。大概是07/08年左右,我終於覺得跟人說迷過謝霆鋒不是什麼不堪的青春。後來漸漸發現,身邊不少朋友都好喜歡他當年的歌。由傳出謝霆鋒要開演唱會開始,loop了他的歌一個星期,彷彿首首都些碎碎念,那就重啟「每日一歌」吧。來個「謝霆鋒特別限定」也不錯。由14-01-2014,寫到30-01-2014,逢星期一至五,總共13+1bonus,首bonus係結集送既!total 14首歌。
(本文是為整個「每日一歌:謝霆鋒特別限定」系列的結集。系列playlist在這裡。)
* * *
我好中意好中意好中意謝霆鋒用盡全身力咁唱chorus既歌!果種用力就像運動時身體的快感,每一下,每一下,流汗、淋漓、屏持住--到chorus用最大的力一下子迸發衝勁。他有好多歌都是這樣的pattern(大家之後可以留意下),當中首推〈因為愛所以愛〉,我被裡面那種用力觸動,像有個人捉住我雙臂來搖晃。
「因為愛,所以愛,感情不必拿來慷慨,誰也不用給我一個美好時代,我要你現在。」曲:謝霆鋒/詞:林夕
謝霆鋒第一首自己包辦作曲填詞的主打。因為曲詞都是自己的,〈末世紀的呼聲〉推出後開始有人留意:「原來呢條死靚仔都識寫歌填詞」。當年朋友E跟我說,謝霆鋒話〈末世紀的呼聲〉只會出一次3吋single(即日本曾很流行的長方形packing single),所以一定要買。後來當然又有收錄在精選中,難免呻笨。又再事隔多年,朋友E都升呢為媽媽了,我卻在想,如她當年買的〈末世紀的呼聲〉single還健在,可是很有紀念價值啊!
「不需回頭,不必再罵我為了瞬間擁有,若是痛恨我,未珍惜過,我會自言自語中,說我沒錯」曲、詞:謝霆鋒
(特別揀呢個校服look版本!你地班謝霆鋒粉絲慢慢J啦~)
1998年,夏天。藍田某女校某中三班房。作文堂。不知什麼原因,大家不肯做miss給的作文題目。擾攘一回,miss屈服了,改作「自由題」。然後又是另一陣討論。(比你自己起題目又要嘈作乜,女人真係好煩。)我凝視著綠色格子,開始想題目。很快我便想到了,用喜歡的歌名便OK喇!於是我開始寫:「如果只得一星期」……文章是怎樣的?忘記了。後來,A-level讀文學,常常在歌詞、歌名裡找靈感,寫過好多好多強說愁的作文交功課,連日文歌的翻譯歌詞都不放過,借一兩句,鋪成一文。時至今日,寫文時偶爾也喜歡用一兩句歌詞,融入文章裡頭,不著痕跡便好。
「如果只得一星期,寧願哪日放開你,以後會更回味;哪個角度凝望你,留住哪段晨曦,哪一種方法喜歡你」曲:伍樂城/詞:林夕
我認為〈活著VIVA〉才是謝霆鋒終極MK之作!因為呢首歌衍生的膠事/柒事太多:馳名中外的「單線solo」,阿霆鋒多次係live時狀甚激動地彈奏只需按動一條弦線的簡單樂譜。曾經係高登年度大事既「膠歌頒獎典禮」,其中一年用〈活著VIVA〉做開場,果個intro既爆破音效,十足十新城頒獎禮咁,勁爆。好掛住巴打刁民,佢好似潛左水無再做膠歌電台了:O)。仲有點少得「肥仔一跌落渠」?呢首係柒頭東之歌!雖然後個兩單唔關謝霆鋒事,但〈活著VIVA〉膠味濃郁,啲人先會用首歌黎配膠事~一齊唱!!「頭東一跌落渠就連部單車都失去,叫朋友過來救命換來一下被拒~」呀唔係,呢個先岩:
「年輕得踫著誰亦能像威化般乾脆,快活到半日也像活盡一百萬歲」曲:謝霆鋒/詞:林夕
謝霆鋒對上一隻廣東大碟,已經係05年的《One Inch Closer》。第一plug係周國賢寫既〈塞車〉,當時我好興奮,謝霆鋒竟然唱周生呢個半紅不黑既人寫既歌!仲要用來做第一plug!〈塞車〉係ok既,好周生式既抒情咁。但對比之下,我更中意第二plug〈狼〉。一來搖滾風才是我杯茶,二來歌詞的唔忿氣、唔受硬、頑固、執著,hit中了我的憤怒:我發火時都係唔好惹的!!留意2:27句歌詞:「會要你亦不能安枕!!」謝霆鋒沙晒聲咁唱出「安枕」兩粒字……果種怨念拍得住叫人落地獄呀!(BTW,MV入面便利店個條仔,係之前踢南華宜家踢東方既文彼得!!)
「每次被攻擊時候,也要去硬啃;每次被屈的時候,卻變了罪人;我到達崩潰時候,會要你亦不能安枕!」曲:Eric Kwok/詞:李峻一
一些舊事。中六時,一個非常要好的朋友拿了EX的電結他彈〈不要說謊〉的前奏,當我準備要唱第一句,他合起手指按住了弦線,停下來,對我說:「淨係記得頭幾句。」除了他彈過〈不要說謊〉,我好像沒有在那個結他聽過一首完整的歌。記憶和感情因年月而變得零零碎碎,一樣不完整。至於那個結他的下場,我也不知道。〈不要說謊〉其實是一首日文改編歌,原曲是シャ乱Q的〈こんなにあなたを愛しているのに〉。
「不要說謊,不要說謊,不要記得,流過的汗;不再說謊,不再說謊,當我比你善忘」曲:Hatake/詞:林夕
我有這張EP。老屈初戀送我的。某天在他家執屋,他執出一大堆CD,說全部不要。我眼厲地盯住了《無聲彷有聲》上面的謝霆鋒:「嘩!你唔要比我!」都唔知隻碟其實係佢定佢細佬的,總之就被我帶走了。今日再睇〈無聲彷有聲〉的MV,好像預言。雖然不是為了反核而上街,但那一個混亂的風景、二人對立的張力,就似謝霆鋒和葉佩雯手中的奶茶,放手了--跌進海裡,收不回來。1:33的寫信師傅,現在還有幾多個?1:55九龍城上空低飛的航班,亦成往事。
「和情人深深一吻來代替講話,好嗎?這訊號以無聲仿有聲,領略時未需解碼」曲:伍樂城/詞:謝霆鋒、李敏
謝霆鋒早年幾首hit的情歌,〈無聲仿有聲〉、〈早知〉、〈非走不可〉,三首的曲風很相似,我私底下將這三首歌定為「三部曲」,要連住聽。而且,三首歌hit的程度是一級級咁上,〈無聲仿有聲〉係1997年、〈早知〉1998年,兩首都hit的,造起左個勢,到1999年〈非走不可〉時爆hit!〈非走不可〉紅到一個程度,我當年都有抄佢歌詞。(抄歌詞係中學既少女先會做既事!)當時學緊中文打字,我會打歌詞練習,就是打〈非走不可〉。打完,用word排得靚靚的,print出來攝係書後面。
「回頭路窄,然而肉眼總找得到,要走得比你早」曲:伍樂城/詞:林夕
我認我是讀文學之後才知道「潛龍勿用」出自《易經》。當年plug呢首歌時,完全唔明咩叫「潛龍勿用」。加上無認真聽過全首,根本體會唔到此曲之妙:一,唔可以唔聽第一段。前半的靜得交關,唔用earphone的話我經常聽唔到謝霆鋒唱乜。呢段「靜」固然是回應主題,如果無左「靜」的一面,首歌會變得好單一,無對比,得個嘈字。二,當年我只記得chorus一段歌詞,我一直以為首歌講情侶嗌交。全篇歌詞地看,才明白不是那回事。什麼要潛龍勿用?不見光的秘密便要收好。不過那句「人人樂用」我還不太明白。
「就像頸鏈乖乖跟我貼緊,我們明明蜜運,宇宙唯獨我二人。給你精細的血管,給你精美的五官,不等於你需要公開搞試用;給你一柄手槍,不要給你子彈,它會跟你纏綿地溝通」曲:謝霆鋒/詞:林夕
陳奕迅同謝霆鋒其實好friend。大家仲記唔記得佢地兩個係《勁歌》扮Puffy?呢首〈改造人〉就係陳奕迅作曲的。陳奕迅自己都唱過,除左〈改造人〉,仲有〈非走不可〉,收錄係佢的EP《幸福》入面。〈改造人〉呢類講堅持個性、不願妥協、我行我素的歌詞,可以話係謝霆鋒早期的主調,例如〈一窩瘋〉、〈活火山〉、〈前前後後左左右右〉等,便是很直白的說「我就係咁架喇,唔改!吹咩!」同佢早期的反叛形象一脈相承。到〈末世紀的呼聲〉收起了張狂,絮絮地說「亦未甘願隨著漆黑中溶化」;〈改造人〉再推進一層,面對逼不得已的改變,孰好孰壞?
「我默然哀悼,要為誰改造,縱得不得到,都顧及形象,說話時候說知道……因你改變可算好,改變不了怎算好」曲:陳奕迅/詞:因葵
近幾年謝霆鋒無新歌,我隨口唱得最多一定是〈一擊即中〉。每逄一take搞掂時「像一擊即中變出雙倍魔法黑變光單變雙」,或者恥笑同事們的「奇人奇事是神奇伎倆」~其實我不是很喜歡〈一擊即中〉,只是這兩句歌詞太好使好用罷了。使用例:某次扭蛋想要暴風女神一擊即中!
「像一擊即中,變出雙倍魔法黑變光單變雙,是一加一的雙重力量愛得雙向;還發揮雙倍堅決不怕風不怕霜,這力量,就像是不可思議奇人奇事是神奇技倆」曲:謝霆鋒/詞:梁芷珊
呢首絕對是謝霆鋒的滄海遺珠!收錄在謝霆鋒第一隻大碟《My Attitude》入面,同碟的有〈萬誘引力〉、〈壞習慣〉,兩首我都好唔中意。當時諗,你死靚仔黎咋喎,得個17歲唱埋〈萬誘引力〉啲咁大人既歌?(拿,個時我都係得個14歲,都唔知憑乜judge人地?)〈壞習慣〉又嫌低B,(14歲既我其實都係好低B囉。)結果〈回憶是後鏡裡的公路〉呢首我要到呢兩年先第一次聽呀!「千支街燈向後逃」,融情於景加擬人,寫得好好。(好咧,咁我係幾時開始中意謝霆鋒既呢?係1998年〈活火山〉、〈天空這麼大〉、〈如果只得一星期〉開始的。)
「時速恕我不知道,也不介意我迷了路,即使衝出這國土,望著回憶如倒鏡裡那公路,千支街燈向後逃」曲:Francis Wai/詞:李敏
我死心眼的認定了〈玉蝴蝶〉裡的「你」就是王菲。歌詞由第一身出發,不斷問怎樣叫「你」才好,就像情侶間的耳語和小秘密--親密又甜蜜得那個他抱住你在你耳邊輕輕的不斷喚你的名字。「如何叫你會引致幻聽?如何叫你你最有反應?連名帶姓會怪我任性,還是太偽正經?」這樣的歌詞令人太有遐想了……果個仲要係王菲呀!「是人是物仍然維護你,代號亦是任我改!」好man呀謝霆鋒!
「我叫你玉蝴蝶,你說這聲音可像你?戀生花也是你,風之紗也是你,怎稱呼也在這個世界尋獲你」曲:謝霆鋒/詞:林夕
《救火英雄》上畫,plug套戲的主題曲〈愛最大〉,再傳出年底開演唱會,幾件事夾埋,當下謝霆鋒突然紅返晒!餓左謝霆鋒的歌N年,突然有新歌,仲要係廣東歌,真係幾興奮!〈愛最大〉黎講,謝霆鋒唔係用好man個種風格(我成日話好用力好性感),亦唔係〈非走不可〉的悲情或〈玉蝴蝶〉的情深,係一種有少少「練」住把聲去唱。但因為知道chok就係佢,佢就係chok,chok到入骨變相真正的佢就係咁chok;所以無問題,反而仲會覺得佢用左一個「赤子之心」去演繹。(〈巴斯光年〉都係呢種。)〈愛最大〉歌詞呢種好宏觀大愛的主題,對我黎講係死穴,(即係睇奧運開幕講不分膚色體育精神,我係會睇到喊的。京奧除外。)睇《救火英雄》,片尾出歌出字幕,真係要忍一忍,唔係又喊。但見到「大路康莊,一片屬於自己嘅地方,建設烏托邦,人人都生活得好健康」,就覺得太理想了,而家我自己嘅地方被人破壞緊呀!點建設烏托邦呀?!(嬲到想喊!)
「點解可以扮哂偉大,我要去表態,沉默會令未來更腐壞,企硬立場愛最大」曲:謝霆鋒/詞:喬星 / Kit@24Herbs / Phat@24Herbs
* * *
多謝大家支持「每日一歌」!今次come back好好玩,好多朋友同我講話因為睇左我的post而煲返謝霆鋒,哈哈!14首歌,我自己覺得寫得比較好的是〈非走不可〉、〈潛龍勿用〉、〈改造人〉,既有評歌,又有一些自己的故事,而〈一擊即中〉完全是揸流攤~最多人like的是〈潛龍勿用〉,有27個like。最多人討論的是〈活著VIVA〉,有27條comment,可能是因為一post完就有〈活佛VIVA〉,真係咁岩得咁橋~
「每日一歌」會再come back的~等我又儲下歌先;)再次謝謝大家~